هنتكلم النهارده عن موضوع مشهور جداً فى الأطفال حديثى الولاده ، ممكن نكون رأينا الموضوع ده فى أطفالنا أو أطفال قرايبنا و قلقنا و فكرنا ان الموضوع خطير و مبنبقاش عارفين نتصرف ازاى و نروح لدكتور تخصص ايه بالظبط ؟
فى الموضوع ده بإذن الله هنتكلم إيه التفسير الطبى للحالة الـ فى الصورة ، و إمتى نقلق منها ؟ ، و نروح لتخصص إيه بالظبط
فى البداية تشخيص الصورة هو " غمازة العجزية " عباره عن فتحة فى أسفل الظهرعند الأطفال و حديثى الولاده ، بيحدث فى 4 % من البشر و دى نسبة مش قليلة فى الأطفال حديثى الولادة
فى أغلب الأحيان الموضوع بيكون طبيعى مفيهوش أى خطورة بإذن الله ، بس فى أوقات تانية الغمازة العجزية بتكون مصحوبة بعيوب فى الفقرات إسمها تشقق العمود الفقرى أو السِّنْسِنَة المشقوقة
و ده طبعاً خلل ولادى ممكن يشمل الأنبوب العصبى ، الطبيعى إن الأنبوب العصبى يغلق تماماً ، لكن فى الحالة دى الأنبوب العصبى لا يغلق بصفه كاملة أى أن الحبل الشوكى لا يتشكل بشكل كامل
طب السؤال الشهير بقى ؟ إمتى نقلق و نروح لدكتور تخصص إيه ؟
: تبدأ تقلق منها لو فى الحالات الآتية
- لو حجمها اكبر من 5 مل
- لو بتبعد عن فتحة الشرج اكتر من 2.5 سم
- لو اكتر من واحدة
- لو مش موجودة فى النص يعنى على جانبى العمود الفقرى
- لو معاها وحمة دموية او شعر فى المنطقة نفسها
- لو الفحص العصبى للطفل فى حاجة مش طبيعية
المتابعة بتبقى مع طبيب تخصص جراحة مخ و أعصاب أطفال
الطبيب بيعمل سونار على الفقرات لو فى حالة من الـ ذكرناها ، و لو لا قدر الله ظهر حاجة مش طبيعية بيعمل أشعه رنين مغناطيسى و يحدد بعدها الطبيب الوقت و العلاج المناسب سواء كان جراحى أو غيره
كده نبقى ذكرنا بإيجاز الموضوع و أتمنى أن الكل يستفيد منه و متنسوش أن نسبة كبيره من الحالات طبيعية بس لازم نطمن على أطفالنا برده
و إنتظرونا فى موضوعات طبية على موقع Egy Medi لإثراء الثقافه الطبية بين الجميع
Comments: 0
Post a Comment